Հուլիսի 25-ին, ժամը 18:00-ին Ալեքսանդր Սպենդիարյանի տուն-թանգարանի դահլիճում կայացավ «Երաժշտական ուրվապատկերներ» խորագրով ինտերակտիվ համերգ-քննարկում: Ներկայացվեցին ԵՊԿ ուսանող կոմպոզիտորներ՝ Անահիտ Մնացականյանի, Ջեմմա Մինասյանի, Անահիտ Գրիգորյանի, Արամ Խանլարիի, Հասմիկ Հակոբյանի և Հերմինե Հարությունյանի ստեղծագործությունները: Երաժշտական ծրագրին զուգահեռ, երիտասարդ կոմպոզիտորները հանդիսատեսների հետ մասնակցեցին անմիջական զրույց-քննարկմանը:

Երեկոյին ներկա էին ԵՊԿ ուսանողներ և դասախոսներ, երաժշտագետներ, կոմպոզիտորներ և երաժշտասերներ: Թանգարանի տնօրեն Մարինե Օթարյանը ջերմորեն ողջունեց մասնակիցներին և խոստացավ երիտասարդ երաժիշտներին, մասնավորապես՝ կոմպոզիտորներին ինքնարտահայտման համար հարթակ տրամադրող նախագիծը դարձնել շարունակական: Երեկոյի ավարտին ներկաները բաժանվեցին՝ նոր երաժշտական հանդիպումների ակնկալիքով: