Նոյեմբերի 1-ին լրացավ հայ մեծանուն կոմպոզիտոր, դիրիժոր, բազմակողմանի երաժշտա-հասարակական գործիչ Ալեքսանդր Սպենդիարյանի ծննդյան 150-ամյակը: Հոբելյանական օրը նշանավորվեց նրա անունը կրող երեք մշակութային հաստատություների՝ օպերայի և բալետի ազգային ակադեմիական թատրոնի, տուն-թանգարանի և երաժշտական մասնագիտական դպրոցի նախաձեռնությամբ: Օպերային թատրոնի հարակից պուրակում մի քանի սերնդի մշակութային գործիչներ և երաժշտասերներ ծաղիկներ խոնարհեցին կոմպոզիտորի շիրիմին: Հայաստանի պարի պետական անսամբլի կողմից (գեղարվեստական ղեկավար` Սուրեն Չանչուրյան) ներկայացվեց պարային  ֆլեշմոբ` Սպենդիարյանի նշանավոր «Էնզելին»:
Միջոցառման երկրորդ հատվածը կայացավ օպերային թատրոնի մեծ ճեմասրահում: Կենտրոնական բանկի կողմից Սպենդիարյանի տուն-թանգարանին հանձնվեց հայ մեծ դասականի 150-ամյակի հոբելյանական հուշադրամ: Միջոցառման համերգային բաժնում թատրոնի մեներգիչների կատարմամբ հնչեցին Ա. Սպենդիարյանի, Ն. Ռիմսկի-Կորսակովի, Ս. Ռախմանինովի ռոմանսներից, ինչպես նաև մեներգեր Ռիմսկի-Կորսակովի «Ձյունանուշը» և Սպենդիարյանի «Ալմաստ» օպերայից: