Համերգ Վիեննայում՝ նվիրված Ալեքսանդր Սպենդիարյանի ԵՎ Առնո Բաբաջանյանի հոբելյաններին
Նոյեմբերի 6-ին Վիեննայի "Antonio-Vivaldi" համերգասրահում, Ավստրիայում ՀՀ դեսպանության և Ավստրիայի Հայ Առաքելական եկեղեցական համայնքի վարչության աջակցությամբ կայացավ հոբելյանական համերգ՝ նվիրված հայ մեծանուն կոմպոզիտորներ Ա. Սպենդիարյանի ծննդյան 150-ամյակին և Ա. Բաբաջանյանի ծննդյան 100-ամյակին։
Համերգը կազմակերպել էին Լոնդոնի Քլինգենի կամերային նվագախմբի գեղարվեստական ղեկավար և դիրիժոր Սիփան Օլահը և Ավստրիայում բնակվող ալտահար և երաժշտագետ Գայանե Միրզոյանը: Լոնդոնյան համերգից հետո այս միջոցառումների նպատակն էր Ավստրիայում նույնպես ներկայացնել հայ մեծանուն կոմպոզիտորների ստեղծագործական ժառանգությունը։
Համերգին մասնակցեցին դիրիժոր, դաշնակահար, տենոր Սիփան Օլահը (Միացյալ Թագավորություն), սոպրանո Հայարփի Եղիկյանը (Միացյալ Թագավորություն), Ավստրիայում բնակվող սոպրանո Թեհմինե Շաուֆերը, մեցցո-սոպրանո Թերեզա Բեգլարյանը, բաս Նիկոլաս Լեգյողը, դաշնակահարուհի Գրետա Էրհարտեր-Սարգսյանը, լարային քառյակը՝ մասնակցությամբ Ֆելիքս Հարությունյանի և Աստղիկ Սիրադեղյանի՝ ջութակ, Գայանե Միրզոյանի՝ ալտ և Կոնստանտին Զելենինի՝ թավջութակ, ինչպես նաև վոկալ անսամբլը:
Համերգի բացմանը հանդիսատեսին ողջույնի խոսքով դիմեց Ավստրիայում ՀՀ դեսպան Արմեն Պապիկյանը: Դեսպանը շնորհակալություն հայտնեց կազմակերպիչներին նման նախաձեռնության համար, կարևորեց հայկական երաժշտական հարուստ մշակույթի հանրահռչակումը նաև Հայաստանի սահմաններից դուրս: Միջոցառմանը ներկայացվեց ՀՀ մշակույթի վաստակավոր գործիչ, Սպենդիարյանի տուն-թանգարանի տնօրեն Մարինե Օթարյանի ողջույնի ուղերձը: Համերգին ներկա էին բազմաթիվ հյուրեր, հոգևորականներ Հայ Առաքելական եկեղեցուց և Մխիթարյան Միաբանությունից, ինչպես նաև ավստրացի երաժշտասերներ:
Համերգի նախորդ օրը՝ նոյեմբերի 5-ին, Վիեննայում Ավստրիայի Հայ առաքելական եկեղեցական վարչության սրահում անցկացվեց դասախոսություն Ա.Սպենդիարյանի և Ա.Բաբաջանյանի վերաբերյալ։ Բանախոսներն էին մաեստրո Սիփան Օլահը (Միացյալ Թագավորություն) և երաժշտագետ Գայանե Միրզոյանը (Ավստրիա): Դասախոսությունն ուղեկցվեց կոմպոզիտորների երաժշտությամբ՝ տենոր Սիփան Օլահի, սոպրանո Թեհմինե Շաուֆերի, դաշնակահարուհի Գրետա Էրհարտեր-Սարգսյանի կատարմամբ: Ներկայացվեցին Սպենդիարյանի նվագախմբային ստեղծագործությունների տեսաձայնագրությունները Լոնդոնում Քլինգեն կամերային նվագախմբի կատարմամբ՝ մաեստրո Ս.Օլահի ղեկավարությամբ:
