Հունիսի 29-ին Ա. Սպենդիարյանի տուն-թանգարանի դահլիճում կայացավ Գեորգի Բուդաղյանի «Դիտարկումներ Ա. Ա. Սպենդիարովի «Ալմաստ» օպերայի գործիքավորման շուրջ» գրքի շնորհանդես-գինեձոնը:

Մեծ դիրիժորը և սպենդիարյանագետն այս հիմնարար աշխատությունը ստեղծել է`տասնամյակներ շարունակ ղեկավարելով և ուսումնասիրելով «Ալմաստ» օպերան:
Գիրքը նվիրված է կոմպոզիտորի ծննդյան 150-ամյակին: Այն հրատարակել է Սպենդիարյանի տուն-թանգարանը («Էդիթ Պրինտ» հրատարակչություն), գլխավոր խմբագիր` ԵՊԿ պրոֆեսոր Ալինա Փահլևանյան, մասնագիտական խմբագիր՝ Վահագն Վարդանյան: Պահպանվել է ուսումնասիրության լեզուն`ռուսերենը: Գիրքն արժեքավոր ուղեցույց է դիրիժորների, կոմպոզիտորների, երաժշտագետների, երաժիշտ մանկավարժների և առհասարակ,Սպենդիարյանի ստեղծագործությունը հետազոտողների համար ինչպես Հայաստանում, այնպես էլ արտերկրում: Միջոցառմանը հյուրերին ողջունեց և գրքի հրատարակության կարևորությունն ընդգծեց տուն-թանգարանի տնօրեն Մարինե Օթարյանը: Ա. Փահլևանյանն իրականացրեց խորհրդանշական գինեձոնը: Ցերեկույթի երաժշտական հատվածում հնչեցին կոմպոզիտորի ստեղծագործություններից՝ Ա. Սպենդիարյանի անվ. երաժշտական դպրոցի քանոնահարների անսամբլի և Վահագն Վարդանյանի  կատարմամբ: