Փետրվարի 19-ը` ամենայն հայոց բանաստեղծի ծննդյան 153-րդ տարեդարձի և Գիրք նվիրելու օրն Ա. Սպենդիարյանի տուն-թանգարանում նշանավորվեց գրական-երաժշտական ցերեկույթով:

Մասնակիցները Երևանի տարածաշրջանային թիվ 1 պետական քոլեջի և Ռ. Մելիքյանի անվ. պետական երաժշտական քոլեջի սաներն էին:

Միջոցառումը բազմաշերտ էր` ասմունք, ընթերցումներ, երաժշտական կատարում և դիտումներ: Առանցքում երկու մեծանուն արվեստագետների` Հովհաննես Թումանյանի և Ալեքսանդր Սպենդիարյանի հանդիպումն էր և ստեղծագործական առնչությունը: Անդրադարձ կատարվեց նաև մեկ այլ մեծ բանաստեղծի` Եղիշե Չարենցի 125-ամյա հոբելյանին:

Այդ խորհրդանշական օրը Սպենդիարյանի տուն-թանգարանը Հայաստանի Ազգային գրադարանի հետ համատեղ մեկնարկեց կոմպոզիտորի 150-ամյակի շրջանակում հրատարակված Գ. Բուդաղյանի «Դիտարկումներ Ա. Սպենդիարովի «Ալմաստ» օպերայի գործիքավորման շուրջ» գրքի՝ ԱՊՀ երկրների գրադարաններին փոխանցելու գործընթացը: