Արցախցի երեխաները` Սպենդիարյանի տանը
Դեկտեմբերի 27-ին Ա. Սպենդիարյանի տուն-թանգարանը կրկին լցվեց արցախյան շնչով:
Հադրութի շրջանից տեղանաված երեխաներն իրենց ծնողների հետ հյուրընկալվեցին կոմպոզիտորի հյուրընկալ հարկի տակ: Նրանք շրջեցին թանգարանում, ծանոթացան Սպենդիարյանի կյանքի ու գործի մանրամասներին, իսկ դահլիճում նրանց սպասվում էր անակնկալներով լի տոն :
Gasparyan's artists vocal innovation school - ի պատրաստած Ամանորյա ծրագրին միացան Հադրութի Dizak Art Դիզակ Արտ կենտորնի սաները և իրենց խրոխտ ու ոգևորող ելույթներով է՛լ ավելի թեժացրին տոնական օրը: 10-ամյա Արման Հարիյանի ինքնաբուխ կատարումները ևս մեկ անգամ փաստեցին հայի ոգու անսասանությունն ու ապրելու և ապրեցնելու ուժը:
Անակնկալ ժամանած ձմեռ պապն էլ միացավ մեզ ու իրեն հատուկ առատաձեռնությամբ նվերներ բաժանեց:
Ցուցադրվեց թանգարանի գիտաշխատող Ինեսսա Խաչատրյանի հեղինակած «55 կադր՝ 55-ամյա թանգարանից» տեսաֆիլմը, որը ներկայացնում էր տուն-թանգարանի՝ կես դարից ավելի շարոնակվող տարեգրությունը:
Սպենդիարյանական երկերի՝ փողային նվագարանների համար փոխադրումներով հանդես եկան Թամար Հարությունյանը (ֆլեյտա), Վարդգես Հովհաննիսյանը (ֆագոտ), Էրիկ Գրիգորյանը (հոբոյ) և Կատարինե Հովսեփյանը (դաշնամուր):
Թանգարանի կողմից շնորհակալագրեր հանձնվեցին թանգարանի նախկին աշխատակիցներ՝ գիտաշխատողներ Կարինե Մարգարյանին, Սարգիս Հովհաննիսյանին, ինչպես նաև թանգարանի նորեկ գիտաշխատող Կատարինե Հովսեփյանին:
