Հայ մեծանուն կոմպոզիտոր Ալեքսանդր Սպենդիարյանի հիշատակի օրվա առթիվ մայիսի 11-ին արվեստագետները, պաշտոնյաներն ու Սպենդիարյանի երաժշտության երկրպագուները հեղինակի ստեղծագործությունների ներքո ծաղիկներ խոնարհեցին նրա շիրիմին:
Ալ.Սպենդիարյանի տուն-թանգարանի տնօրեն Մարինե Օթարյանը լրագրողների հետ զրույցում հիշեցրեց, որ 1928 թվականի մայիսի 7-ին, երբ Ալեքսանդր Սպենդիարյանը կնքել է իր մահկանացուն, նրա մտերիմ ընկեր Ալեքսանդր Թամանյանի առաջարկությամբ որոշվել է կոմպոզիտորի աճյունն ամփոփել կառուցվելիք ժողովրդական տան այգում, որը հետագայում դարձել է Ալ. Սպենդիարյանի անվան օպերայի և բալետի ազգային ակադեմիական  թատրոնի բակը: «Ասում են՝ Թամանյանն անձամբ էր մշակում  ընկերոջ շիրիմի վարդերն ու հոգ տանում, որ դրանք միշտ դալար մնան: Որոշեցինք ժամանակի մտավորականության, մեր հասարակության միջոցով վերականգնել այդ ազնվագույն ավանդույթն ու կոմպոզիտորի շիրիմին իրականացնել վար դատունկ»,-ասաց Օթարյանը:
 Վարդատունկն իրականացրեցին կոմպոզիտոր ՀԽՍՀ ժողովրդական արտիստ Տիգրան Մանսուրյանը, Օպերային երգչուհի, ՀՀ վաստակավոր արտիստ Հասմիկ Պապյանը, Արմեն Բուդաղյանը ինչպես նաեւ այլ անվանի արվեստի գործիչներ։
Կոմպոզիտորի անվան օպերայի և բալետի ազգային ակադեմիական թատրոնի նվագախումբն ու երգչախումբն էլ Սպենդիարյանի արձանի մոտ հետաքրքիր մեկնաբանությամբ՝ ֆլեշմոբի շրջանակում կատարեցին կոմպոզիտորի ստեղծագործությունից փոքրիկ դրվագ։
Միջոցառումն իրականացվեց ՀՀ ԿԳՄՍ նախարարության և Ալ.Սպենդիարյանի տուն-թանգարանի համագործակցությամբ: