Վլադիլեն Բալյան
Մայիսի 8-ին Ալեքսանդր Սպենդիարյանի տուն-թանգարանի դահլիճում հերթական անգամ թևածում էր բալյանական շունչը: Այս անգամ կոմպոզիտոր Վլադիլեն Բալյանին իրենց մեծարանքն ու նվիրումն էին բերել նրա երիտասարդ երաժիշտ գործընկերները՝ ԵՊԿ պրոֆեսոր, դաշնակահար Մարգարիտ Սարգսյանը, օպերային երգչուհի Նարինե Անանիկյանը, օպերային երգիչ Արսեն Գևորգյանը: Նրանք հանդես եկան համերգային ծրագրով. հնչեցին Վ. Բալյանի՝ Ս. Կապուտիկյանի և Ե. Չարենցի բանաստեղծությունների հիման վրա գրված ռոմանսներ: Վ. Բալյան մարդու, երաժշտի, արվեստագետի մասին իրենց երախտիքի խոսքն ասացին և հուշեր պատմեցին Ա. Սպենդիարյանի տուն-թանգարանի տնօրեն Մարինե Օթարյանը, Սիլվա Կապուտիկյանի տուն-թանգարանի տնօրեն Արմենուհի Դեմիրճյանը, արձակագիր, արվեստաբան Սեյրանուհի Գեղամյանը, նկարիչ, արվեստաբան Ղարիբ Եղիազարյանը: Երեկոն նշանավորվեց Վ. Բալյանի «Երգը, մեր երգը» ստեղծագործության (խոսք՝ Սիլվա Կապուտիկյանի) հիման վրա Ն. Անանիկյանի հեղինակած և նկարահանած տեսահոլովակի շնորհանդեսով:
